Vende Unike

Shtëpia e Ismail Kadaresë

Muzeu i Armëve

Muzeu Etnografik

Shtëpia e Skëndulajve

Ura e Ali Pashës

Antigonea

Kalaja e Gjirokastrës

Pazari i Gjirokastrës

Pazari i Gjirokastrës me rrugët e tij të kalldrëmta e fasadat e bardha përbën qendrën dhe zemrën e qytetit të vjetër. Atraksioni i parë me të cilin ndeshen vizitorët, mendohet se i përket periudhës osmane edhe pse asgjë nuk ka mbetur nga ajo periudhë. Duke bërë një shëtitje rreth qendrës historike të qytetit, do të eksploroni shumë nga atraksionet kryesore të Gjirokastrës.
Kalaja e Gjirokastrës, padyshim është një nga kalatë më madhështore në Shqipëri dhe nga më të mëdhatë në Ballkan, që ofron një panoramë mahnitëse mbi luginë. Kalaja, e cila ka marrë emrin sipas princeshës Argjiro, që refuzoi t'i dorëzohej pushtuesve osmanë duke u hedhur nga muret e kalasë, ngrihet hijerëndë në majë të një kodre duke e bërë atë një vend unik që nuk duhet humbur.
Shtëpia e Skëndulajve e ndërtuar në vitin 1705 është një atraksion i përkryer për të mësuar më shumë rreth arkitekturës tradicionale të shtëpive gjirokastrite dhe ndarjen klasore duke u nisur vetëm nga dekori i banesës.
Qyteti antik i Antigonesë i cili mban statusin e Parkut Arkeologjik shtrihet në anën lindore të luginës së Drinos dhe mbulon një sipërfaqe prej 45 hektarësh. Sipas historianit të lashtë grek Plutarkut, Antigonea ishte qyteti që u lind nga dashuria dhe u shkatërrua nga urrejtja.

Ura e Ali Pashës është dëshmia e përpjekjeve të Ali Pashë Tepelenës për të vënë në punë kompleksin e ujësjellësit në Gjirokastër, i ndërtuar mbi një sistem kanalesh dhe urash madhështore, që për herë të parë do të furnizonin kalanë me ujë nga mali i Sopotit. Edhe sot studiuesit e vizitorët mahniten nga mjeshtëria e ndërtimit të saj. Është një vepër spektakolare, vizita e së cilës ia vlen edhe pse ndodhet larg qendrës së qytetit.
Muzeu Etnografik i njohur gjerësisht si shtëpia e fëmijërisë së Enver Hoxhës është shembulli ilustrues se si jetonte klasa e lartë shoqërore e shekullit të 19-të në jug të Shqipërisë. Duket se shtëpia nuk ofron vetëm idenë e fëmijërisë së diktatorit, por të gjithë historinë e Gjirokastrës, një qytet që në shumë mënyra ndikoi në historinë e një shteti të tërë.
Shtëpia e Ismail Kadaresë, shkrimtari shqiptar me famë botërore, e cila u kthye në muze 3 vite më parë, është e hapur për publikun dhe është një nga vendet që nuk duhet humbur gjatë vizitës suaj në Gjirokastër.
Muzeu i Armëve u hap në vitin 1971 si Muze Kombëtar, duke sjellë armë nga e gjithë Shqipëria, të përdorura gjatë Luftës së Parë dhe të Dytë Botërore. Ky muze përfshin disa pavione, si Muzeu i Armëve, Muzeu i Gjirokastrës dhe burgu.

Bashkëpunëtorët tanë