Në qytetin e Gjirokastrës funksionojnë 4 linja autobusësh. Shërbimi i autobusëve funksionon rregullisht çdo ditë dhe për të gjithë turistët e jo vetëm ka një linjë autobusi që lidh qendrën historike me qytetin e ri. Autobusët lokalë janë një mënyrë praktike për të shkuar nga njëra anë e qytetit në tjetrën dhe anasjelltas. Rrethrrotullimi në qendër të qytetit është thuajse 10 minuta larg me këmbë nga stacioni i autobusëve në Rrugën e Kombit. Rruga është përgjatë bulevardit kryesor. Gjithashtu turistët mund të marrin një nga linjat urbane nga një nga stacionet e autobusit përgjatë bulevardit "18 Shtatori" për të vizituar zona të ndryshme të qytetit. 

Taksitë janë më se të përshtatshme dhe të këshillueshme nëse doni të vizitoni vende, që nuk janë të aksesueshme me autobus ose në këmbë. Në qytetin e Gjirokastrës ka dy vendqëndrime për taksitë, një tek Ura e Lumit, e njohur ndryshe edhe si Ura e Lunxhërisë, dhe vendqëndrimi tjetër tek bulevardi "18 shtatori". Taksitë janë të lira, por për të pasur një ide të saktë mbi tarifën e itinerarit tuaj, duhet të pyesni më parë taksistin.