Të vizitosh qytetet antike

Jo shumë larg Gjirokastrës mund të vizitoni qytetin antik të Antigonesë, i cili mban statusin e Parkut Arkeologjik dhe qytetin antik të Adrianopolit, nga i cili kanë mbetur vetëm rrënojat e tij. Adrianopoli, 14 km larg qytetit, është ndërtuar gjatë periudhës së Perandorisë Romake dhe mbart vlera të rralla historike dhe kulturore. Parku Arkeologjik i Antigonesë shtrihet në anën lindore të luginës së Drinos dhe mbulon një sipërfaqe prej 45 hektarësh. Sipas historianit të lashtë grek Plutarkut, Antigonea themeluar në shekullin e 3-të para Krishtit, ishte qyteti që u ndërtua nga dashuria dhe u shkatërrua nga urrejtja.